Գիտնականները սմարթֆոնների մարտկոցների ծառայության ժամկետը երկարացնելու միջոց են գտել
Սթենֆորդի համալսարանի եւ ԱՄՆ-ի SLAC արագացուցչի ազգային լաբորատորիայի գիտնականները փորձարկում են անցկացրել, որի ընթացքում մարտկոցի ոչ ակտիվ լիթիումը վերադարձրել է աշխատունակությունը: Սա, ըստ հետազոտողների, թույլ է տվել 30%-ով ավելացնել փորձնական մարտկոցի ծառայության ժամկետը։
Գիտնականները նշում են, որ լիթիումային մարտկոցների քայքայումը տեղի է ունենում, այսպես կոչված, ոչ ակտիվ լիթիումի կղզյակների պատճառով։ Դրանք առաջանում են մարտկոցի ցիկլային օգտագործման դեպքում: Այսպես, լիթիումի իոնները տեղաշարժվում են երկու էլեկտրոդների միջեւ, ընդ որում՝ դրանցից մի քանիսը շարքից դուրս են գալիս եւ դառնում էլեկտրաքիմիապես ոչ ակտիվ՝ առաջացնելով կուտակումներ, ինչի հետեւանքով մարտկոցի պարունակությունը նվազում է։
Սակայն գիտնականները ենթադրել են, որ լիցքավորման եւ լիցքաթափման հոսանքների հատուկ պայմաններում հնարավոր է ոչ ակտիվ լիթիումը տեղափոխել այս կամ այն էլեկտրոդի ուղղությամբ եւ «վերադարձնել այն կյանքի»: Այս նպատակին հասնելու համար գիտնականները փորձարկում են կատարել թեստային մարտկոցների վրա եւ, համակարգչային մոդելավորում օգտագործելով, ցույց են տվել, որ մեկուսացված լիթիումը իսկապես կարող է վերականգնվել լիցքավորման գործընթացում փոփոխությունների միջոցով: Ըստ թիմի՝ այս բեկումը 30%-ով ավելացրել է թեստային մարտկոցի ծառայության ժամկետը: Հետազոտողները նշել են, որ այս փուլում մարտկոցի պարունակությունը տնային պայմաններում հնարավոր չէ վերականգնել։ Լիթիում-իոնային մարտկոցները լայնորեն օգտագործվում են ժամանակակից կենցաղային տեխնիկայի, էլեկտրամեքենաների, հեռախոսների, նոթբուքների եւ այլնի մեջ:
