Պերուի վարչապետը հրաժարական կտա կնոջն ու դստերը ծեծելու մեղադրանքների պատճառով

Պերուի վարչապետ Հեկտոր Վալերn այդ պաշտոնում նշանակվելուց ընդամենը չորս օր անց հաստատել է, որ հրաժարական կտա՝ իր դստերը և հանգուցյալ կնոջը ծեծի ենթարկելու մեղադրանքներից հետո:

Ինչպես նշում է The Guardian-ը, երկրի նախագահ Պեդրո Կաստիլյոն հայտնել է, որ նախարարների կաբինետում փոփոխություններ կանի՝ Վալերին վարչապետ նշանակելու համատարած դատապարտման ֆոնին:

Ինքը վարչապետը նշել է, որ ընտանեկան բռնության վերաբերյալ մեղադրանքները կեղծ են:

Պարբերականը մանրամասնում է, որ երեքշաբթի Վալերի նշանակումից ժամեր անց, ի հայտ են եկել 2016-ին թվագրվող ոստիկանական հաղորդումներ, որոնցում վարչապետի դուստրն ու հանգուցյալ կինը նրան մեղադրում են գենդերային բռնության համար: Վալերի 29-ամյա դստեր կողմից ներկայացված բողոքում նշվում է, որ հայրն «ապտակել է, բռունցքով և ոտքով հարվածել է իր դեմքին», ինչպես նաև քաշել մազերը: