Ի՞նչ տարբերություն՝ որ «ուսապարկը» կդառնա նախագահ․ Խաչատրյանը՝ Փաշինյանի տեղապահ Բաղրամյան 26-ում

Իշխող «Քաղաքացիական պայմանագիր» կուսակցությունը նախագահի թեկնածու է առաջադրելու բարձր տեխնոլոգիական արդյունաբերության նախարար, անկուսակցական Վահագն Խաչատուրյանին, երեկ երեկոյան գրել է Նիկոլ Փաշինյանի ընտանիքին պատկանող «Հայկական ժամանակ»-ը։

Ավելի ուշ «Արմենպրես» պետական գործակալությունը հաստատեց այս լուրը՝ գրեթե ակնհայտ դարձնելով հանրապետության 5-րդ նախագահի անունը։

Նախագահի թեկնածու առաջադրելու գործընթացում իշխանությունն, անշուշտ, կիրառեց PR տեխնոլոգիա։ Սկզբում շրջանառու դարձվեց վարչապետի աշխատակազմի ղեկավար Արայիկ Հարությունյանի անունը, որի թեկնածությունը խիստ բացասական ընկալվեց ոչ միայն հասարակության կողմից, քաղաքական շրջանակներում, այլ նաև ՔՊ-ում։ Անգամ երկրի «գլխավոր աներձագ» Հրաչյա Հակոբյանը շտապեց հայտարարել, որ Հարությունյանի թեկնածությունը ՔՊ-ն չի քննարկել։

Գրեթե վստահ կարելի է պնդել, որ ի սկզբանե Արայիկ Հարությունյանի թեկնածությունը լուրջ չի քննարկվել, փորձ է արվել նրա բացասական կերպարի ֆոնին ներկայացնել Վահագն Խաչատրյանի համեմատաբար տանելի ֆիգուրը։ Կասկած չկա, որ մի օր Նիկոլ Փաշինյանը կհայտարարի, որ այս հարցում հաշվի են առել հանրային տրամադրությունները։

Սակայն սկզբունքորեն կապ չունի, թե ով է դառնալու նախագահ։

Փաշինյանն արդեն արձանագրել է, որ նա պետք է ապահովի «քաղաքական ներդաշնակություն», այլ խոսքով՝ Նիկոլ Փաշինյանի համար լինի «գրպանային նախագահ»։

Ի՞նչ տարբերություն՝ որ «ուսապարկը» կդառնա նախագահ․ նա ընդամենը լինելու է Նիկոլ Փաշինյանի տեղապահը Բաղրամյան 26-ում։ Վահագն Խաչատրյանը լիովին համապատասխանում է այս չափանիշներին, մանավանդ, որ նա Փաշինյանի իշխանությանն ինտեգրվել է վարչապետին մոտ կանգնած օլիգարխ Խաչատուր Սուքիասյանի ջանքերով։

Ավելին, Խաչատրյանն այն բացառիկ նախարարներից է, որ Փաշինյանից ավելի ջերմեռանդ է պաշտպանել, այսպես կոչված, «խաղաղության դարաշրջանի» օրակարգը։ Ի դեպ, երեկ երեկոյան այս փաստն ուրախությամբ արձանագրում էին ադրբեջանական ԶԼՄ-ները՝ Խաչատրյանի թեկնածությունը դիտարկելով հենց Փաշինյանի «խաղաղության դարաշրջանի» զարգացման համատեքստում։

Վահրամ Բագրատյան