Ի՞նչ իրավիճակ է սահմանին Փաշինյան-Պուտին-Ալիև հանդիպման նախաշեմին
- SMM Hub
- Nov 20, 2022
- 1 min read
Նախորդ գիշերը հայ-ադրբեջանական սահմանին իրավիճակը հարաբերական հանգիստ է եղել։
MediaHub.am-ի հետ զրույցում Գեղամասար խոշորացված համայնքի Կութ բնակավայրի վարչական ղեկավար Սիմա Չիտչյանը հայտնեց, որ իրավիճակը հանգիստ է։
«Վերջին օրերին կրակոցներ չկան, արտառոց միջադեպեր չեն գրանցվել»,- ասաց նա։
Մեզ հետ զրույցում Վարդենիս խոշորացված համայնքի Վերին Շորժա բնակավայրի վարչական ղեկավար Արտյոմ Երանոսյանն էլ հայտնեց, որ իրենց մոտ ևս կրակոցներ չկան։
«Ես մշտական կապի մեջ եմ, դիրքերում իրավիճակը հանգիստ է, բայց թշնամին մնում է թշնամի, մեր տղաները զգոն են, մենք էլ՝ նրանց թիկունքին կանգնած»,- հայտնեց Երանոսյանը։
Նա նշեց, որ հատկապես Փաշինյան-Պուտին-Ալիև հանդիպման ֆոնին լարվող վիճակը հաշվի առնելով՝ զգոնությունն ավելի է մեծացել։
Տավուշի մարզի Նոյեմբերի շրջանի Կոթիի համայնքապետ Ֆելիքս Մելիքյանը հայտնեց, որ վերջին անգամ կրակոցներ իրենց մոտ եղել են ամիսներ առաջ։
Արմինե Նավոյան