Պուտինը 2024 թվականին պետական այցով Չինաստան կմեկնի . ԱԳՆ
Սպասվում է, որ Ռուսաստանի նախագահ Վլադիմիր Պուտինը պետական այց կկատարի Չինաստան 2024 թվականին։ Այս մասին երեքշաբթի՝ ապրիլի 9-ին, հայտնել է ՌԴ ԱԳՆ մամուլի ծառայությունը՝ դիվանագիտական գերատեսչության ղեկավար Սերգեյ Լավրովի ՉԺՀ կատարած այցից հետո։
«Չինաստանի ղեկավարը ողջունել է Սերգեյ Լավրովի ժամանումը Պեկին՝ որպես կարևոր փուլ Ռուսաստանի նախագահ Վլադիմիր Պուտինի՝ այս տարի Չինաստանի Ժողովրդական Հանրապետություն կատարելիք պետական այցի համապարփակ նախապատրաստման գործընթացում»,- ասվում է մամուլի հաղորդագրությունից։
Չինաստանի նախագահ Սի Ցզինպինն ընդունել է ապրիլի 9-ին Պեկին ժամանած արտգործնախարար Սերգեյ Լավրովին։ Հանդիպումը տեղի է ունեցել Ժողովրդի տանը։ Մինչ այս ՌԴ դիվանագիտական ծառայության ղեկավարը հանդիպել է Չինաստանի արտաքին գործերի նախարար Վան Յիի հետ։ Լավրովը նրա հետ քննարկել է Արևմուտքի կողմից Ուկրաինայի նախագահ Վլադիմիր Զելենսկու «խաղաղության բանաձևի» խթանումը։
Եվրասիական հարցերով Չինաստանի կառավարության հատուկ ներկայացուցիչ Լի Հուին ասել է, որ Չինաստանի իշխանությունները անհրաժեշտ են համարում խաղաղության համաժողովի կազմակերպումը, որը հավասարապես կճանաչեն թե՛ Ռուսաստանը, թե՛ Ուկրաինան։
