Լևոն Բարսեղյանը՝ ՔՊ-ին. Չզանգեք, միչեւ ձեր զրպարտիչները ներողություն չխնդրեն ինձնից ու մեր թիմից

Եվրադաշինքի կողմից Գյումրու քաղաքապետի թեկնածու առաջադրված Լևոն Բարսեղյանը, արձագանքելով Մարտուն Գրիգորյանի հայտարարությունից հետո ստեղծված իրավիճակին, գրում է.

«Կոնդակ տեղական ողբի մասին

ՔՊ հարգելի ցավքաշողներ, ժամանակին, որ բան էինք բացատրում, մտածում էիք առաջնորդն է իմաստուն եւ չկա մեկն ավելի իմաստուն: Մի քիչ ուժ հավաքեք ու թափով սուս մնացեք: Կամ ելույթներն սկսեք հետեւյալ նախադասությամբ.

«Քաղաքացիական պայմանագիր կուսակցությունը, միայն այսօր ժամը 15:29-ի կողմերը ընկալեց, թե ինչեր չի արել անցած 7 տարիների ընթացքում, հասկացավ, որ պետության զավթմանը հարկավոր էր քաղաքական գնահատական տալ, անցումային արդարադատության բոլոր գործիքները գործարկել հանուն առաջադեմ Հայաստանի, իրականացնել ոստիկանական, քննաչական, դատախազական եւ դատական համակարգերի ամբողջական եւ անվերապահ վեթինք, պետական եւ համայնքային կառավարման համակարգերից հեռացնել եւ օրենքով արգելել բոլոր նրանց պաշտոնավարումն ու թեկնածուական շարժը, որոնք այս կամ այն կերպ խառնված են եղել կոռուպցիային, քվե ծախելուն եւ գնելուն, ընտրությունները ապականելու այլեւայլ գործողությունենրին, լյուստրացիա իրականացնել, հրապարակել օտարներին ծառայություններ մատուցածների եւ երկրի ինքնաիշխանությունը տարբեր կերպ ոտնձգածների անվանական ցանկերը, արգալափակել պետական եւ համայնքային իշխանության մարմիններում դրանց հայտնվելու բոլոր ճանապարհները, ապօրինի գույքի հրատապ եւ անսակարկելի վերադարձն ապահովել, կրթական եւ այլ համակարգերի մաքրումը պետության զավթմանը մասնակցած հանցագործներից եւ այլն: Հաշվի առնելով, որ այս ամենը հասկացել ենք միայն Գյումրիում քաղաքական ապտակ ստանալուց հետո, կարծում ենք, որ ....» Մնացածը շարադրեք ձեր ճաշակով, ինչ ուզում եք շարադրեք:

Թե բա «...հազիվ մի քանի ամիս դիմանան», թե բա «...թույլ կոալիցիա է», թե բա «...լավ չեղավ սիրելի գյումրեցիներ, տեսաք ինչ արեցիք»: Տո դուք խաբար չեք՝ ինչ է նշանակում իշխանությունը ատամներով բռնել, էն փողաբեր, դիրքաբեր անպատիժ իշխանությունը: Տո շատ էլ լավ եղավ, էս էլ է շատ էս քաղաքին, կապրեն էլի հին կանոններով, կզած եւ անծպտուն, դուք էլ, պարոնայք-տիկնայք քպականներ, դիտելու եք, խելոք դիտելու եք ինչպես են վերականգնվում հին ադաթները այստեղ: 14 հոգի ունեք ավագանու կազմում, փորձեք տեղական ինքնակառավարում կարդալ, բարդ կլինի, բայց կարդալ փորձեք: Չզանգեք, միչեւ ձեր զրպարտիչները ներողություն չխնդրեն ինձնից ու մեր թիմից: Մի քիչ քիթումռութ կանեք ու սիրուն կհամագործակցեք ռոբասերժակրեմլապաշտական կոալիցիայի ու իր պարագլուխ Ղուկասյան Վարդանի հետ: Բարի, հեզաճկուն անձնավորություն է, որ համեստ մնաք՝ վնաս չի տա։ Էս էլ ասեմ, վերջին լավությունս ձեզ. Աբոն ասում էր. - թշնամիներին հաղթելու ամենալավ ձեւը բարեկամ դարձնելն է:- Գիտենալով ձեզ էլ, ձեր նոր քաղաքապետին էլ, պիտի ասեմ, որ շանս կա, փորձեք, մարդու ձեռը օդում թողնելը լավ բան չէ: Կարող է առաջարկեք ՔՊ անդամ էլ դառնալ, ինքը հանուն քաղաքի պատրաստ է նման ծանր հարվածների, դեմը էլի ընտրություններ են»։