Հոլանդիայում փորձնական ռեժիմով գործարկվել է Hyperloop ճեպընթաց գնացքը

Hardt Hyperloop ընկերությունը՝ ըստ ընկերության կայքում զետեղված հաղորդագրության՝ Հոլանդիայի հյուսիս-արևելքի Վենդամ քաղաքում (Գրոնինգեն նահանգ) գերարագ վակուումային գնացքի բարեհաջող փորձարկում է արել: Գնացքը հիմնված է Hyperloop տեխնոլոգիայի վրա:

Նշվում է, որ գնացքը մոտ 30 կմ/ժ արագությամբ հաջողությամբ հաղթահարել է Եվրոպական Hyperloop կենտրոնում տեղակայված 420 մետրանոց խողովակի առաջին 90 մետրը։ Ըստ Hardt Hyperloop-ի տեխնոլոգիաների և ճարտարագիտության տնօրեն Մարինուս վան դեր Մեյսի՝ ընկերությունը մտադիր է շարունակել փորձարկումները, ներառյալ՝ գնացքի լիակատար՝ մոտ 100 կմ/ժ արագությամբ։ Փորձարկման՝ 80-100 կմ/ժ արագությամբ հաջորդ փուլը նախատեսվում է ավարտել հաջորդ տարի:

Ըստ գերմանական NTV հեռուստաալիքի՝ աշխարհի այլ ընկերություններ նույնպես աշխատում են Hyperloop տեխնոլոգիայի զարգացման վրա։ Մասնավորապես, Չինաստանում կա փորձարկման հարթակ, որտեղ այս տեխնոլոգիայի վրա հիմնված փոխադրամիջոցները հասնում են մինչև 700 կմ/ժ արագության։ ԱՄՆ-ում, մինչդեռ, նմանատիպ գնացք մշակող Hyperloop One ընկերությունը փակվել է։

Hyperloop-ի գաղափարը 2012 թվականին առաջարկել է Իլոն Մասկը։ Մտահղացման էությունն այն է, որ ուղևորներով կամ բեռներով պատիճները մինչև 1220 կմ/ժ արագությամբ խողովակներով շարժվեն երկրի մակերևույթից բարձր՝ խիստ նոսրացած օդի պայմաններում: