Մենք չենք խաղում ոչ-ոքիների համար, այլ ցանկանում ենք 3 միավոր. Ռուի Մոտա

Կոնֆերենցիաների լիգայի լիգայի փուլի 4-րդ տուրում «Նոան» Երևանում կմրցի «Վիկինգուրի» հետ։ Այսօր կայացել է երևանյան թիմի գլխավոր մարզիչ Ռուի Մոտայի նախախաղային ասուլիսը, որին ներկայացել է նաև թիմի ու Հայաստանի ազգային հավաքականի պաշտպան Սերգեյ Մուրադյանը։

«Արդեն երկու տարի է՝ խաղում եմ Հայաստանում և շատ երջանիկ եմ: Այո, շատ առաջընթաց եմ գրանցել, բայց սա իմ առավելագույնը չէ. ցանկանում եմ ավելի ու մեծ աճ գրանցել: Վաղը խաղաժամանակ ստանալու դեպքում կանեմ առավելագույնը: Ցանկանում եմ ավելի մեծ առաջընթաց ունենալ:

Մեր թիմում 26 խաղացող կա, և նրանցից յուրաքանչյուրը շատ բարձր որակ ունի: Ինձ դուր է գալիս խաղալ ինչպես Պաբլոյի, այնպես էլ Գոնսալոյի հետ: Նրանք երկուսն էլ շատ լավ խաղացողներ են, ու ինձ համար տարբերություն չկա, թե ում հետ կխաղամ պաշտպանության կենտրոնում»,- ասել է Մուրադյանը:

Թիմի պորտուգալացի մարզիչ Ռուի Մոտայի խոսքով՝ Կոնֆերենցիաների լիգայում թույլ թիմեր չկան, իսկ իր թիմը պատրաստ է վաղվա խաղին։

«Կարծիքս չի փոխվել: Ֆուտբոլում այսպիսի մի բան կա. չես կարող դատողություն անել թիմի անունից: Հակառակ դեպքում ունենում ես սպասելիքներ, որոնք չեն համապատասխանում թիմի իրական մակարդակին: «Վիկինգուրը» Իսլանդիայի չեմպիոն է եղել: Այդպիսի առաջնությունում չեմպիոն դառնալու համար պետք է իսկապես շատ լավ թիմ ունենաս: Վիճակահանությունը տեսնելով՝ գիտեինք, որ այն շատ մրցունակ թիմ պետք է լինի, ինչպես Կոնֆերենցիաների լիգայի բոլոր թիմերը, քանի որ այստեղ թույլ թիմեր չկան:

«Վիկինգուրը» շատ լավ և մրցունակ թիմ է: Նրանք շատ լավ են պաշտպանվում և սիրում են տիրել գնդակին․ դրական թիմ են ու ունեն լավ խաղացողներ: Կարծում եմ՝ վաղը շատ մրցակցային խաղ կլինի: Վստահ չեմ, որ նրանք ուղղահայաց փոխանցումներով են սիրում խաղալ: Այո, երբեմն այդպես է, բայց եթե դիտենք նրանց խաղերն ինչպես ներքին առաջնությունում, այնպես էլ Կոնֆերենցիաների լիգայում, կտեսնենք, որ նրանք ավելի շատ դիրքային ֆուտբոլ են խաղում: Վերջին երկու խաղերում հիմնականում դիրքային ֆուտբոլ են ցուցադրել: Լավ ենք ուսումնասիրել «Վիկինգուրին», ինչպես անում ենք մեր յուրաքանչյուր մրցակցի դեպքում: Գիտենք նրանց ուժեղ և թույլ կողմերը: Վաղվա խաղում պատրաստ ենք համապատասխան մարտավարություն ընտրել ու լինել խաղի մեջ՝ փորձելով ինչպես միշտ 3 միավոր վաստակել։«Ռապիդի» դեմ խաղում Թորարինսոնի վնասվածքը շատ վճռորոշ պահ էր. մենք ունեինք առավելություն, իսկ Գուդիի հետ կապված իրավիճակը նրանց մարզչին թույլ տվեց որոշ փոփոխություններ կատարել խաղում: Այո, դա ազդեց, բայց երկրորդ խաղակեսում մենք շատ մրցունակ տեսք ունեինք ու հաջողությունը փոքր-ինչ չժպտաց մեզ՝ գոլ խփելու և այդ խաղում մեկ միավոր վաստակելու համար: Մենք, իհարկե, հոգ ենք տանում մեր խաղացողների համար, նրանք ընկերներ են, անհանգստանում են իրար համար, բայց գիտեն, որ մենք շատ մրցունակ կազմ ունենք: Ցավոք, Գուդին չի կարողանա մասնակցել վաղվա խաղին, բայց կլինի մեկ ուրիշ խաղացող, որը կներդնի իր ողջ ուժերը և կանի առավելագույնը:

Իհարկե, մենք ունենք տարբերակներ: Ես այնպիսի մարզիչ չեմ, որը կգա այստեղ ու լաց կլինի, որ իմ տրամադրության տակ չեն Գուդին, Սանգարեն: Ես շատ գոհ եմ այն կազմից, որն ունեմ: Մեր կազմում կան շատ խաղացողներ, որոնք կարող են փոխարինել Սանգարեին, ինչպես խաղային նույն ոճն ունեցող, այնպես էլ՝ տարբեր: Հարցն այստեղ խաղի մարտավարության ու խաղային դրվագների մեջ է: Ես շատ գոհ եմ այն խաղացողներից, որ ունեմ և վստահ եմ՝ 11 խաղացողները, որոնք վաղը դուրս կգան խաղադաշտ, 100 տոկոսով կներդնեն իրենց ուժերը:Դա մեզ չի գոհացնի, քանի որ մենք չենք խաղում ոչ-ոքիների համար, այլ ցանկանում ենք 3 միավոր: Եթե անկեղծ, դեռ շատ վաղ է դատողությունների համար: Սեղանին դրված է 9 միավոր, մենք արդեն 3-ն ունենք: Կարծում եմ՝ ամեն ինչ հնարավոր է: Ըստ իս՝ վաղվա խաղով չի որոշվի՝ մենք պայքարը կշարունակե՞նք, թե՞ ոչ: Ինչպես միշտ՝ խաղադաշտ դուրս կգանք 3 միավորի համար. սա մեր հոգեբանությունն է, մեր ճանապարհն ու նպատակը, որի ուղղությամբ մեր ակումբն աշխատում է: Վաղվա խաղում ոչինչ չի փոխվելու: Անկախ հաշվից՝ մենք դեռ շանս կունենանք այս մրցաշարում առաջ գնալու համար»,- ասել է Մոտան: