Պուտինն ուղերձ է հղել Սիրիայում իշխանությունը վերցրած ուժին
ՌԴ նախագահ Վլադիմիր Պուտինը ուղերձ է հղել Սիրիայում իշխանությունը վերցրած Ահմեդ ալ-Շարաային։
«ՌԴ նախագահ Վլադիմիր Պուտինը աջակցություն է հայտնել իրավիճակի արագ կայունացմանն ուղղված ջանքերին՝ ի շահ Սիրիայի ինքնիշխանության, անկախության, միասնության և տարածքային ամբողջականության»,- ուղերձի բովանդակությունն է ներկայացրել ՌԴ նախագահի մամուլի խոսնակ Դմիտրի Պեսկովը։
Պեսկովը հայտնել է նաև, որ Պուտինը պատրաստակամություն է հայտնել զարգացնել ռուս-սիրիական հարաբերությունները։
«Վերահաստատվել է, որ Ռուսաստանը պատրաստակամ է զարգացնելու փոխգործակցությունը Սիրիայի ղեկավարության հետ՝ երկկողմ օրակարգի բոլոր ուղղություններով՝ ռուս-սիրիական ավանդական բարեկամական հարաբերություններն ամրապնդելու նպատակով»,- ասել է ՌԴ նախագահի մամուլի խոսնակը։
Նշենք, որ ՌԴ նախագահի և Սիրիայում իշխանությունը վերցրած ուժի ղեկավար Ահմեդ ալ-Շարաայի միջև առաջին անգամ հեռախոսազրույց էր տեղի ունեցել փետրվարին։ Ռուսաստանի նախագահը հանդես էր եկել Սիրիայի միասնության, ինքնիշխանության և տարածքային ամբողջականության պահպանման օգտին, ինչպես նաև պատրաստակամություն էր հայտնել աջակցել Սիրիայի սոցիալ-տնտեսական վիճակի բարելավմանը, մարդասիրական օգնություն տրամադրել։ Ահմեդ ալ-Շարաան էլ ասել էր, թե Սիրիայի ու Ռուսաստանի միջև հաստատված են ամուր ռազմավարական հարաբերություններ։
