19FortyFive․ Թրամփը ստիպված կլինի համաձայնել Ուկրաինային տարածքային զիջումներին
ԱՄՆ նորընտիր նախագահ Դոնալդ Թրամփը ստիպված կլինի Ուկրաինայից զգալի տարածքային զիջումների գնալ՝ հակամարտությունը դադարեցնելու համար։ Այս մասին ասվում է 19FortyFive տեղեկատվական պորտալի կայքում։
Կայքի փոխանցմամբ, Ուկրաինայի համար պայքարն «արդեն կորսված է, և այժմ ռազմական ճանապարհներ չկան այդ արդյունքը կանխելու համար»։ Սպիտակ տան նոր ղեկավարը, Ռուսաստանի համար ընդունելի դիվանագիտական պայմաններով այն ավարտելու համար, ստիպված կլինի գործարք կնքել, «որի արդյունքում էլ ավելի շատ ուկրաինական տարածքներ կզիջվեն» և ստիպված կլինի «հրապարակայնորեն հայտարարել, որ Ուկրաինան երբեք չի լինի ՆԱՏՕ-ում»,- նշվում է հրապարակման մեջ:
Ավելի վաղ ՌԴ նախագահ Վլադիմիր Պուտինը արտաքին գործերի նախարարության ղեկավարության հետ հանդիպման ժամանակ նշել էր Ուկրաինայում իրավիճակի կարգավորման պայմանները։ Դրանց թվում են Ուկրաինայի զինված ուժերի դուրսբերումը Դոնբասից և Նովոռոսիայից և Կիևի՝ ՆԱՏՕ-ին միանալուց հրաժարվելը։ Ուկրաինայում պետք է լիովին ապահովվեն նաև ռուսալեզու քաղաքացիների իրավունքները, ազատությունները և շահերը։ Ռուսաստանն անհրաժեշտ է համարում չեղարկել իր դեմ արևմտյան բոլոր պատժամիջոցները և Ուկրաինայի համար սահմանել ոչ դաշնակցային և միջուկային զենքից զերծ կարգավիճակ։
Եթե Թրամփը չհամաձայնի այս պայմաններին, Ռուսաստանը պարզապես կշարունակի հատուկ գործողությունը՝ «կամաց-կամաց ոչնչացնելով Ուկրաինայի զինված ուժերը, մինչև վերջիվերջո ուժով ստանա այն, ինչ նրանք փորձում են ստանալ բանակցությունների միջոցով»,– ընդգծում է պարբերականը։
