Ուկրաինայում Հայաստանի դեսպանը և Երևանի Նոր Նորքի թաղապետն այցելել են Բուչա
- 24timeam
- Jun 2, 2024
- 1 min read
Ուկրաինայում Հայաստանի դեսպան Վլադիմիր Կարապետյանը և Երևանի Նոր Նորք վարչական շրջանի ղեկավար Տիգրան Տեր-Մարգարյանն այցելել են Ուկրաինայի Բուչա քաղաք։ Այս մասին Instagram-ի հարթակում հայտնել է Բուչայի քաղաքային վարչակազմը։
Օտարերկրյա հյուրերին քաղաքային խորհրդի շենքում դիմավորել է Բուչայի քաղաքապետ Անատոլի Ֆեդորուկը՝ իր տեղակալ Անլինա Սարանյուկի հետ, նշվում է հաղորդման մեջ։
Հանդիպման ընթացքում քննարկվել է Բուչայի և Երևանի Նոր Նորք համայնքների միջև համագործակցության հաստատման հնարավորությունը։
Հայկական պատվիրակությունը որպես մարդասիրական օգնություն դեղամիջոցներ է նվիրաբերել Բուչայի երկրորդական օղակի բժշկական հաստատություններին։
«Մենք հպարտանում ենք ուկրաինացի ժողովրդի քաջությամբ, որը պաշտպանում է իր ազատությունն ու անկախությունը մարտի դաշտում։ Երևան քաղաքը և Նոր Նորքի շրջանը մշտապես աջակցելու են Բուչային և ռուսաստանյան ագրեսիայից տուժած մյուս համայնքներին։ Այս մարդասիրական օգնությունը մեր համերաշխության մի փոքր մասն է միայն»,- ընդգծել է Տիգրան Տեր-Մարգարյանը։
Հյուրերը անմեղ զոհերի հիշատակը հարգել են 509 սպանված խաղաղ բնակիչների հուշահամալիրի ինստալյացիայի մոտ, հայտնում է Բուչայի քաղաքային վարչակազմը: