Ռադան նոր արտգործնախարար է նշանակել Կուլեբայի փոխարեն

Գերագույն ռադան այսօր, սեպտեմբերի 5-ին, նշանակել է Ուկրաինայի արտաքին գործերի նոր նախարար՝ Անդրեյ Սիբիգային։ Այս մասին տեղեկացրել է «РБК-Украина»-ն՝ հղում կատարելով ժողպատգամավոր Յարոսլավ Ժելեզնյակի թելեգրամին։

Սիբիգան ծնվել է 1975թ. հունվարի 1-ին Տերնոպոլի մարզի Զբորիվ քաղաքում։

Կրթությունն ստացել է Լվովի Ի.Ֆրանկոյի անվան պետական համալսարանում։ Սովորել է միջազգային հարաբերությունների ֆակուլտետում, անգլերենի թարգմանիչ է։ Ավելի ուշ ավարտել է նույն ուսումնական հաստատության իրավագիտության ֆակուլտետը՝ իրավաբանի մասնագիտությամբ։

Աշխատանքային գործունեությունն  սկսել է 1997թ. որպես Ուկրաինայի ԱԳՆ Պայմանագրաիրավական վարչության պետաիրավական հարցերի բաժնի երկրորդ քարտուղար։

Աշխատել է Լեհաստանում եւ Թուրքիայում Ուկրաինայի դեսպանություններում։ Եղել է Ուկրաինայի ԱԳՆ եվրոպական ինտեգրման վարչության իրավական եւ հումանիտար համագործակցության բաժնի առաջին քարտուղարը։

Սկսած 2021 թվականից մինչեւ 2024թ. զբաղեցրել է Ուկրաինայի նախագահի աշխատակազմի ղեկավարի տեղակալի պաշտոնը։ Զբաղվել է արտաքին քաղաքականության եւ ռազմավարական գործընկերության զարգացման հարցերով։

Արդեն այս տարի Սիբիգան նշանակվել է Ուկրաինայի արտաքին գործերի նախարարի առաջին տեղակալ։