«ՀՐԱՊԱՐԱԿ»․ ԿՐԹՎԵԼԸ ՆՈՐԱՁԵՒ Է, ԲԱՅՑ ԱՄԵՆ ԻՆՉ ՁԵՒ Է

Վարչապետն ու իր կինը տարօրինակ պատկերացում ունեն բարեգործության մասին: Ամուսինը «Կրթվելը նորաձեւ է» շարժման համար կամավորներ է հավաքում, կինը երիտասարդ տղամարդկանց բիզնես ցանկություններն է բավարարում՝ բարեգործական հիմունքներով։ Հասկանալի է, երբ կամավոր հիմունքներով մարդիկ ծերերի են խնամում, հաշմանդամների, այցելում են մանկատներ կամ շների կացարաններ՝ կենդանիներին խնամելու։ Իսկ իշխանական ընտանիքը կասկածելի քարոզչական խմբեր է ձեւավորում, որոնց անունը դնում են կամավորներ: «Իմ քայլը» հիմնադրամը կամավորներ է հավաքագրում` ինչ-որ հանձնաժողովներում աշխատելու: Հանձնաժողովների անվանումները խոսուն են՝ Ինքնիշխան Հայաստան, Know how, Էթիկայի հանձնաժողով։

Առաջինը հատկապես հետաքրքիր է։ Այստեղ աշխատելու համար պետք են պատմաբաններ, քաղաքագետներ, իրավաբաններ, փիլիսոփաներ, լրագրողներ, PR մասնագետներ։ Ինչպես ասված է հաղորդագրության մեջ, նրանք զբաղվելու են ազգային, ինքնիշխան պետականության արժեհամակարգի հանրայնացման եւ քաղաքացիական կրթությամբ, այլ կերպ ասած՝ պետք է առաջ հրեն փաշինյանական քարոզչությունը, որը, շատերի կարծիքով, նշանակում է ազգային արժեքների ժխտում` ի շահ այլ, թշնամի պետությունների։ Հասկանալի չէ, թե ինչ կապ ունի այս քարոզչությունը կրթության հետ։ Know how հանձնաժողովում ներգրավվելու են տնտեսագետներ, ուսուցիչներ, PR մասնագետներ, լրագրողներ, բիզնես-թրեյներներ։ Իսկ էթիկայի՝ բարեկրթության հանձնաժողովը համալրելու են «մշակույթի, արվեստի, համապատասխան մասնագիտական կրթությամբ մարդիկ»։ Հետաքրքիր է՝ որտեղի՞ց են այդքան պարապ մասնագետ գտնելու, որ զբաղվեն տվյալներ հավաքելով, մոնիթորինգով, միջոցառումների կազմակերպմամբ, տեսանյութեր նկարելով, տեքստեր գրելով: «Եթե սիրում եք գրել, խմբագրել կամ աշխատել տպագիր ու թվային նյութերի հետ՝ այս խումբը ձեզ համար է»,- ասված է հաղորդագրության մեջ:

Կրթության փորձագետ Ատոմ Մխիթարյանին հարցրինք` ի՞նչ կարծիքի է «Կրթվելը նորաձեւ է» պսեւդոշարժման մասին: «Այդ ամենի պատասխանը տվել է վարչապետը՝ կառավարության նիստի ընթացքում, երբ ասաց, որ Հայաստանում կադրերի ճգնաժամ կա: Նրանք չեն կարողանում նորմալ կադրեր գտնել, որոնք աշխատեն պետական կառավարման, կրթության ոլորտում, նույնիսկ վարպետներ չկան կարգին: Նա ակնհայտ ասաց, որ հերիք է թաքցնենք` որեւէ տեղ որեւէ նորմալ մասնագետ չունենք: Հիմա որտեղի՞ց պետք է նա այդքան մարդ գտնի՝ պատմաբաններ, ուսուցիչներ, PR մասնագետներ, կամավոր աշխատելու համար: Իրականում սա հերթական փուչիկն է, եւ վաղը կասեն՝ ի՞նչ կարող ենք անել, եթե ո՛չ կադր կա, ո՛չ մասնագետ»: Ատոմ Մխիթարյանն ասում է, որ վերջին տարիներին` կառավարության փոփոխությունից հետո կրթության որակն էապես անկում է ապրել: «Բարձրագույն կրթություն ստացողների թիվը վերջին 6 տարում պակասել է շուրջ 25 տոկոսով:

Պրոֆեսորադասախոսական անձնակազմինը պակասել է շուրջ 21 տոկոսով: Ո՞ւր են գնացել այն մարդիկ, որոնք 2015, 2016, 2017 թվականներին աշխատում էին այս ոլորտներում կամ սովորում էին ՀՀ բուհերում` կա՛մ Հայաստանից դուրս են եկել, կա՛մ ոլորտն են փոխել, քանի որ 5-6 տարում այսքան մարդ չէր կարող կյանքից հեռանալ: Յուրաքանչյուր 5-ից 1-ը դուրս է եկել ոլորտից, սա է պատկերը»: Բայց այս փուչիկ-նախաձեռնություններն ի՞նչ հարց են լուծելու: «Յուրաքանչյուր աշխատանք պահանջում է տքնաջան ներդրում, ջանք, ու դա պետք է անեն մասնագետները, որոնք տվյալ ոլորտում անցած հետագիծ ունեն: Մեկն ասել էր վերջերս` Հայաստանի առանձնահատկությունն այն է, որ մարդու կենսագրությունը ինչ-որ բան անելու համար կարեւոր չէ: Հայաստանում ամեն ինչ ձեւ է` առանց բովանդակության»:

Իսկ վարչապետի կնոջ ղեկավարած «Իմ քայլը» հիմնադրամը զբաղված է փոքրիկ բիզնեսմեններ աճեցնելով: «Հաջողակից՝ սկսնակ» փոքր բիզնեսի աջակցման ծրագրի շրջանակներում «Երիտասարդի երազանք» նախագիծ կա` այն ջահելների համար, որոնք փողի մասին են երազում, սակայն պարզվում է, Աննայի հովանավորյալ բիզնեսմեններն այնքան էլ փոքր չեն՝ 86 առողջ տղամարդ են` 25-40 տարեկան, որոնք իրենց ծրագրերն են ներկայացնելու «Իմ քայլը» հիմնադրամի հանձնաժողովին եւ ստանալու են դրամաշնորհներ: Տղամարդ լինելը պարտադիր պայման է: «Սա վճռական պահ է նրանց համար, քանի որ ներկայացված ծրագրերի բովանդակությունից ու իրատեսական լինելուց է կախված՝ արդյոք դրանք կարժանանա՞ն դրամաշնորհի»,- հաղորդում է հիմնադրամը։ Դրամաշնորհները գոյացել են 2024-ի աշնանը կազմակերպված բարեգործական ընթրիքից գոյացած 62 մլն դրամից: 

Երբվանի՞ց է բիզնեսմեններին աջակցելը բարեգործություն համարվում, եւ ինչո՞ւ է իշխանական զույգը մի ձեռքով օգնում, մյուսով թալանում բիզնեսը, հարկեր ու տուրքեր ավելացնելով սրանք հռետորական հարցեր են: Կարեւորն այն է, որ այս բիզնեսմեններից գոյանալու է ՔՊ-ի ոգուն ու ավանդույթներին հավատարիմ դարբնոց: Դրամաշնորհներ բաշխող հանձնաժողովի անդամները եւս հավատարիմներն են, որոնք, ի դեպ, կապ չունեն բիզնեսի հետ՝ Լենա Նազարյանը («Իմ քայլը» հիմնադրամի հոգաբարձուների խորհրդի նախագահ), Վահագն Թեւոսյանը, որն «Իմ քայլի» խորհրդի անդամ է, ՀՀ էկոնոմիկայի նախարարության ռազմավարական ոլորտների վարչության պետը, սոցապի «Աշխատանքի եւ սոցիալական հետազոտությունների ազգային ինստիտուտ» ՊՈԱԿ-ի տնօրենը, ԿԳՄՍՆ երիտասարդության հարցերի վարչության պետը: Ինչպես ասում են՝ մենք՝ մերոնցով: