Սիլիկյան թաղամաս - Հյուսիս-Հարավ. ե՞րբ վերջ կդրվի «գլխակեր» ճանապարհի էպոպեային

Արդեն տևական ժամանակ է Սիլիկյան թաղամասի հարևանությամբ Հյուսիս-Հարավ ճանապարհը վարորդները որակում են որպես «գլխակեր»: Ինչը հիմնավորված է՝ այս հատվածում վթարները հաճախակի են ու, ցավոք, նաև մահվան ելքով:

Նոր ճանապարհը շատ հարմար է, այն թույլ է տալիս ընդամենը մի քանի րոպեում Սիլիկյան թաղամասից հասնել Իսակով պողոտա: Բայց իր մեջ վտանգ է պարունակում, քանի որ կտրուկ թեքություն ունի և վարորդներից ոմանք դրա պատճառով հաճախ արագության տակ բախվում են  բաժանարար բետոնե արգելապատնեշին, շրջվում կամ թռնում ճանապարհից դուրս: Մի քանի ամիս առաջ, օրինակ, կին վարորդ էր մահացել, 2023 թվականի ընթացքում այս հատվածում բազմաթիվ վթարներ են տեղի ունեցել:Ամենաթարմ դեպքն էլ տեղի է ունեցել հունվարի 1-ի գիշերը. ժամը 05։50-ին 

«Mercedes-Benz» մակնիշի ավտոմեքենան դուրս է եկել ճանապարհի երթևեկելի հատվածից, բախվել էլեկտրական սյանը, արգելապատնեշին, գլորվելով հայտնվել կամրջի տակ և բռնկվել: Բարեբախտաբար, վարորդը ողջ է մնացել, հոսպիտալացվել է բժշկական կենտրոն։ Մեքենան ամբողջությամբ այրվել է:Նման սարսափելի ելքով վթարները այս հատվածում, կրկնվենք, հաճախակի են լինում: 

Ուզում ենք հավատալ, որ Ճանապարհային ոստիկանությանը ևս այս խնդրով մտահոգված է, քանզի ահազանգեր շատ է ստանում: Ակնկալում ենք նաև, որ այս հատվածը շուտով կկահավորվի  արագությունը զսպող գծանշումներով կամ այլ գործիքակազմով, որը նման դեպքերում գերատեսչությունը կիրառում է, այդպիսով վերջ դնելով «գլխակեր» ճանապարհի էպոպեային: